(زجل)
**لعْگال**
إمتى نتفَّك من هاد لعْگال
نَزّهَا شوية ونطلق سراح الراس
نشتت هاد العُرَّام من الهبال
نفضني نفضة لغبار مني تساس
نفك الرّبْطَة اللي بلا حبال
نحل عگدتها بسنّي كيف قالو الناس
نشرَّگ هَدّْون هاد الحال
مايبقى غير مْكَفَّنّي مليت منو لباس
نتحدى اوجاع هاد البال
نگلع الضرس المحني من لضراس
نقْطَعَ مع الناشب الخيال
مانعود فريسةساهلة لكل وسواس
نعاتب ليلي علاش يطوال
طوال معاه سهادي خلني بلانعاس
نلوم بياضي علاش يكحال
وزهري اللي عنادو فات لقياس
نطلق صيحة فصفة موال
واهوايا والمالكني ياك اودي لباس
نگول للراگد هاد شحال
عفاك باركة فيق راه فاض لكاس
نحط هاد الرّفد اللي ثقال
ماكان عليا نرادف حد من الساس
نفرز جملي من بين الجمال
نعفيني من الراعي ومن العساس
نتبورد ف مَحْرَك المُحال
نْݣِيسْ لبحور وخا انا ماشي غطاس
نروي عروق حروفي لاتدبال
نجَبَّرالجبِيرةبجبِيرة مايهمني هرَّاس
نرويني حجاية للغير تتݣال
كلام حلو كلو معنى عمرو مايمساس
بقلم عبدالله الهواري
21/11/2025
تارودانت
