*العهد ماعليه رجوع*
بالحرف الشادي
خفق فؤادي
وتحقق مرادي
مدحك يابلادي
واجب ومشروع.
من مغربنا جينا
عادة فينا هادي
لما الوطن ينادينا
نلبّو النداء عادي
للوحدة نشعلو الشموع.
مغربي بافتخاري
مواطن حضاري
من صغري خديت قراري
الوطن ف دمي جاري
بحب الراية مولوع.
جينا من كل مدينة
من مداشر وبوادي
لي منها مَرّينا
كلها تردد وتنادي
وطنا ف دمنا مطبوع.
وهادي بلادي
عزيزة ياسيادي
هي سمايَ وغطايَ
فراشي وْوسَادي
عليها بالحب نّادي
وبصوتي مسموع.
أنا عليها راضي
فيها زادي
وفيها اعتادي
من زمان هي عزي
وهي عز اولادي
خودي مني يابلادي
نظمي ونشادي
براسي مرفوع.
هَنْ فأرض لجداد
من زمان دݣيت لوتاد
وياسيد لسياد
ياموحد البلاد
بك شملنا مجموع.
ف الشمال والجنوب
ف السهول والروابي
شعارنا مكتوب
بالنار والنور الݣادي
والعهد ماعليه رجوع.
حب حبات الصحراء
الكتبان ولعݣابي
النخلة والسدرة
والساقية والوادي
وانتم ياحبابي
فخر هاد الربوع.
كبرت الداخلة
وصبحت زينة المدُون
قبالتها لنوار شاعلة
ف مدينة العيون
والمسيرة متواصلة
والعالم ناظر بعيون
العَلَم يرفرف مرفوع.
امواج بحرنا متفاءلة
بالمستقبل المضمون
تشوف التنمية هايلة
والوحدة قرار محسوم
الصحراء أسرة والوطن عايلة
خلات فرق الحساد مصدوم
وتقولو : تا مالك مخلوع.
احنا مانتساومو فالوحدة
من طنجة لݣويرة
وهذا هو المبدأ
وماشي لازم تبريرَه
ولاتفسير الموضوع.
أرض الصحرا مغربية
والبيعة دايماً علوية
والشعب بكلمة وحدوية
يقول يالسامع ليا :
عاش الوطن الغالي عليا
عاش الملك السُّدة العالية
والعهد ماعليه رجوع .
والعهد ماعليه رجوع .
بقلم محمد دليزة
